ଜଗନ୍ନାଥ ଦେଶେ ଜନମ ମୋହର
ଭାରତମାତା ସନ୍ତାନ
ଏ ସାରା ସଂସାର ମୋର ପରିବାର
ଓଡ଼ିଆ ମୁଁ ବିଶ୍ୱପ୍ରାଣ।
ମୋ ଘର ମୁରବି ସ୍ଵୟଂ ଜଗନ୍ନାଥ
ଓଡ଼ିଆର ଗେହ୍ଲା ପୁଅ
ଜନମେ ମରଣେ ବିବାହ ବନ୍ଧନେ
କାଳିଆ ଏକା ଆଶ୍ରୟ ।
ଗଜପତି ଯହିଁ ସେବକ ବୋଲାଇ
ଠାକୁର ତହିଁ ସୈନିକ
ଜାତି ପାଇଁ ପିତା ନାହିଁ ପୁତ୍ର ଚିନ୍ତା
ସାକ୍ଷୀ ତାହାର କୋଣାର୍କ ।
ପ୍ରେମ ଯାର ଧର୍ମ ଅଶୋକ ନିର୍ମମ
ପାଲଟିଲେ ଧର୍ମାଶୋକ
ଚୈତନ୍ୟ ବାଣ୍ଟିଲେ ନାମ ପ୍ରେମଭରେ
ଧନ୍ୟ ସେ ମାଟି ମହକ।
ଶୋଭା ଗନ୍ତାଘର ପ୍ରକୃତି ଯାହାର
ମୋହଇ କବି ନୟନ
କବିତ୍ୱେ ମହତ ଏମ ମାଟିର ସନ୍ଥ
ଜାତିସଂଘେ ଲଭେ ସ୍ଥାନ ।
ମୋ ଦେଶ ପାଇକ ରଖିଛନ୍ତି ଟେକ
ସଂଗ୍ରାମେ ବୀର ପଣରେ
ମୋ ଦେଶ ସାଧବ ଅରଜେ ବିଭବ
ସ୍ମୃତି ଯା ବାଲିଯାତ୍ରାରେ ।
ମଠ ଓ ମନ୍ଦିର ସଂସ୍କୃତିର ଘର
ଓଷା ବ୍ରତ ପରମ୍ପରା
ଲୋକଗୀତ ନୃତ୍ୟ କେତେ ଯେ ସଙ୍ଗୀତ
ଶିଖାଏ ଜୀବନ ଧାରା ।
ତପସ୍ୱୀ ସାଧକ କେତେ ଦେଶଭକ୍ତ
ଗଢି ଛନ୍ତି ମୋ ଉତ୍କଳ
ସକଳେ ନମସ୍ୟ ମୋ ପାଇଁ ଅବଶ୍ୟ
ବନ୍ଦଇ ତାଙ୍କ ପୟର ।
ଇତିହାସ ତାର ବହିଛି ସ୍ୱାକ୍ଷର
ସେ ଗୌରବ ଗାଥା ଗୁଣି
ତୋ କୋଳେ ଜନମି ଧନ୍ୟ ଧନ୍ୟ ମୁହିଁ
ବନ୍ଦେ ଉତ୍କଳ ଜନନୀ ।
✍️ଇଂ ବସନ୍ତ କୁମାର ବରାଳ
You might also like