ସି.ବି.ଏସ୍.ଇ ଦଶମ ପରୀକ୍ଷା ଫଳରେ ଓଡିଶା ଆଦର୍ଶ ବିଦ୍ୟାଳୟର ସଫଳତା
ସିବିଏସ୍ଇ ବୋର୍ଡ ଦଶମ ପରୀକ୍ଷା ଫଳ ପ୍ରକାଶ ପାଇଛି । ଏ ବର୍ଷ କାମାକ୍ଷାନଗର ଓଡିଶା ଆଦର୍ଶ ବିଦ୍ୟାଳୟ ରେ ୯୭ ପ୍ରତିଶତ ପାସ୍ ହାର ରହିଛି । ୭୩ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ୭୧ ଜଣ ଛାତ୍ରଛାତ୍ରୀ ଉତ୍ତୀର୍ଣ୍ଣ ହୋଇଛନ୍ତି । ସବୁଠାରୁ ବଡ ସଫଳତା ହେଉଛି ୬୮ ଜଣ ଛାତ୍ରଛାତ୍ରୀ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିବା ବେଳେ, ୩ ଜଣ ଦ୍ବିତୀୟ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି ।
କାମାକ୍ଷାନଗର ର ଶ୍ରୀ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷା କେନ୍ଦ୍ରରେ ଶିକ୍ଷକତା କରୁଥିବା ଶ୍ରୀଯୁକ୍ତ ପ୍ରେମାନନ୍ଦ ବାରିକ୍ଙ୍କ ସୁପୁତ୍ର ଆୟୁଷ୍ମାନ୍ ଏସ୍.ପି. ପୁଲକିତ୍ ବାରିକ୍ ୯୭ ପ୍ରତିଶତ ନମ୍ବର ରଖି ବିଦ୍ୟାଳୟରେ ପ୍ରଥମ ସ୍ଥାନ ଅଧିକାର କରିଛନ୍ତି । ସେହିପରି ଯୁଗ୍ମ ଭାବରେ ୯୬ ପ୍ରତିଶତ ନମ୍ବର ରଖି ଛାତ୍ର ଶୁଭମ ସାହୁ ଓ ଛାତ୍ରୀ ବୈଷ୍ଣବ ରାଉଳ ଦ୍ବିତୀୟ ସ୍ଥାନ ଅଧିକାର କରିଥିବାବେଳେ , ୯୫.୬ ପ୍ରତିଶତ ନମ୍ବର ରଖି ସୁଲଗ୍ନା ରାଉତ ତୃତୀୟ ସ୍ଥାନ ଅଧିକାର କରିଛନ୍ତି ।
ତତ୍ସହିତ ବିଦ୍ୟାଳୟର ୧୧ ଜଣ ଛାତ୍ରଛାତ୍ରୀ ୯୦ ପ୍ରତିଶତରୁ ଉର୍ଦ୍ଧ୍ବ ନମ୍ବର ରଖି ଉତ୍ତୀର୍ଣ୍ଣ ହୋଇଛନ୍ତି । ଫଳାଫଳର ପ୍ରତିକ୍ରିୟାରେ ବିଦ୍ୟାଳୟରେ ଶୀର୍ଷ ସ୍ଥାନ ଅଧିକାର କରିଥିବା ଛାତ୍ର ଏସ୍.ପି. ପୁଲକିତ୍ ବାରିକ୍ ସଫଳତାର ଶ୍ରେୟ ନିଜର ପିତାମାତା ଓ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀଙ୍କୁ ପ୍ରଦାନ କରିଛନ୍ତି ।
