ବରଷାର ଅନ୍ତେ ଆସିଛି ଶରତ
ଚପଳା ପ୍ରକୃତି ସାଥେ
ଚାମର ହଲେଇ ହସେ କାଶତଣ୍ଡୀ
ଶୁଭ୍ର ଧବଳ ପଥେ ll
ଆସିବ ଆସିବ ପାରବଣ ଋତୁ
ଧରା ହେବ ଚମତ୍କାର
ଘୁଞ୍ଚିଯିବ କ୍ଳେଶ ଭରିଯିବ ହସ
ପ୍ରାଣେ ପ୍ରାଣେ ପୁଲକର ll
ମାଆ ଆସୁଛନ୍ତି ସରଗୁ ଓହ୍ଲାଇ
ଦିବ୍ୟ ସାଜସଜା ନେଇ
ଦରଶନ କରି ମାନବ ପରାଣ
ଶାନ୍ତ ହେବ ଦୁଃଖ ଫେଇ ll
ପଡ଼ିଆ ପ୍ରାନ୍ତର ନଈପଠା ବିଲେ
ନୈସର୍ଗିକ ଶୋଭା ରାଶି
ଭରା କାଶତଣ୍ଡୀ ଧବଳ ମୂରତି
ସତେକି ଦେଉଛି ହସି ll
ନିର୍ମଳ ଗଗନେ ରୂପା ଜହ୍ନ ଶୋହେ
ଦିଶେ କେଡ଼େ ଶୋଭାମୟ
ସରସୀରେ ପଦ୍ମ,କଇଁ ଫୁଟିଲେଣି
ଚନ୍ଦ୍ରମାରେ ରଖି ଲୟ ll
ଶକ୍ତି ଦାୟିନୀ ସେ ମୁକ୍ତି ପ୍ରଦାୟିନୀ
ମାଆଙ୍କର ଆବାହନ
ଉଛୁଳି ଉଠୁଛି ଦିବ୍ୟ ଶୋଭା ରାଶି
ମର୍ତ୍ତ୍ୟେ ରଚି ପୁଷ୍ପାଙ୍ଗନ ll
ହେନା,ଯାଈ,ଯୁଇ,ବଉଳ,ମାଳତୀ
ଧବଳ ଲୋହିତ ବର୍ଣ୍ଣେ
ବିଛାଡି ଦିଅନ୍ତି ସରଗ ସୁଷମା
ଦେବତାର ମନ ଜିଣେ ll
ଭଳି ଭଳି ରଙ୍ଗ ସୁବାସ ସାଥୀରେ
ରହିଛି ଅମୀୟ ଭରି
କି ସୁନ୍ଦର ଶୋଭା କେଡ଼େ ମନ ଲୋଭା
ମରତ ଉଠୁଛି ପୂରି ll
ଘେନ ମା’ ପ୍ରଣତି କରୁଛି ମିନତି
ଅଧମ ଏ ତୁମ ପଦେ
ତଵ ଶ୍ରଦ୍ଧା ଦୃଷ୍ଟି ରଖିବ ମୋ ଠାରେ
ଛନ୍ଦ ତୋଳୁଥିବି ଶବ୍ଦେ ll
✍️ ଗୀତାଞ୍ଜଳି ପୃଷ୍ଟି