ଉଚ୍ଚମନ ନେଇ ଉଚ୍ଚଆଶା ନେଇ
ରାଜଧାନୀ ଆସିଛି ଧାଇଁ,
ଗାଆଁ ଠୁ ସହର ପଥ ବହୁଦୂର
ଉଚ୍ଚଶିକ୍ଷା ଲଭିବା ପାଇଁ ।
ମୋ ଜ୍ଞାତି କୁଟୁମ୍ବ ଦେଖି ନାହିଁ କେବେ
ରାଜଧାନୀ ଚାଲି ଚଳନି,
ପାଦ ଥାପିବାକୁ ଦଶ ଥର ଭାବେ
ତଥାପି ଭରଷା ପାଉନି ।
ସାଙ୍ଗ ସାଥି ଆଉ ଗୁରୁଜନ ବୃନ୍ଦ
ମୋ ପାଇଁ ସବୁଠୁ ନିଜର,
ସ୍ନେହ ପ୍ରେମ ଆଉ ପ୍ରେରଣା ଆକଟ
ଏଇତ ମୋର ପରିବାର ।
ଲଭି ଉଚ୍ଚ ଶିକ୍ଷା ଗାଆଁ ପାଇଁ ମୋର
ହେବି ଏକ ଉଦାହରଣ,
ଅକାଳରେ କେବେ ଅନ୍ଧ ବିଶ୍ବାସରେ
ହେବନି କାହାର ମରଣ ।
ବାପା ଜେଜେ ବାପା ସପନ ତାଙ୍କର
ଦିନେ ହେବି ନିଶ୍ଚେ ଡାକ୍ତର,
ଜେଜେ ମାଆ ମୋର ଭରଷା ରଖନ୍ତି
ମୁଁ ହେବି ବଡ଼ ଅଫିସର ।
କରିଛି ଶପଥ କରିବି ସାକାର
ସମ୍ପର୍କୀୟଙ୍କର ସପନ,
ପର ଉପକାରେ ତାଙ୍କରି ସେବାରେ
ବିତିଯାଉ ମୋର ଜୀବନ ।
ଜୀବନରେ ଆସୁ ଯେତେ ଝଡ଼ ଝଞ୍ଜା
ହେବି ନାହିଁ ତିଳେ କାତର,
ସପନ ସାକାର କରିବା ପାଇଁକି
ସଦା ହେଉଛି ଅଗ୍ରସର ।
✍️ସୁବ୍ରତ ସେଠୀ