ସ୍ୱାଗତୋକ୍ତି ଅନୁରାଗ

ସବୁ ବୈଠକରେ ତୁମେହିଁ ପ୍ରବକ୍ତା
ତୁମେହିଁ ବିଦଗ୍ଧ ଶ୍ରୋତା
ସବୁ ମିଳନରେ ତୁମେହିଁ ମାଧୁର୍ଯ୍ୟ
ମୁକୁଳିତ ପ୍ରାଣ ସତ୍ତା ll

ତୁମେହିଁ ଭକ୍ତିର କୋଟି ଫୁଲହାର
ମଧୁମୟ ନିବେଦନ
ଘେନ ପ୍ରଭୁ ମୋର ଶ୍ରଦ୍ଧାର ଅଞ୍ଜଳି
ଭାବମୟ ସମର୍ପଣ ll

ଶରଧା ବାଲିର ମହକ ମଞ୍ଜୁଳ
ଅସ୍ପଷ୍ଟ ସେ ପଦ ରେଣୁ
ଯିବା ଆସିବାର ପଥରେ ପାଥେୟ
ସରାଗେ ଶୁଭଇ ବେଣୁ ll

ତୁମ ବଡ଼ ଦାଣ୍ଡ ଅନେକ ସ୍ମୃତିର
ଅର୍ଥପୂର୍ଣ୍ଣ ଆତ୍ମଚୁକ୍ତି
ସେ ଧୂଳି ପରଶେ ହୃଦୟ ସରସେ
ଫୁଟି ଉଠେ ଅନୁରକ୍ତି ll

ତୁମ ସିଂହଦ୍ୱାରେ ତୁମେହିଁ ଠାକୁରେ
ପ୍ରହରା ଦେଉଛ ନିତି
ଅରୁଣ ସ୍ତମ୍ଭର ପାଖରେ ବିରାଜି
ଭକତେ ଡାକୁଛ କତି ll

ଡେଇଁ ସିଂହ ଦ୍ୱାର ବାଇଶି ପାବଛେ
ଥାପି ଦେଲାପରେ ପାଦ
ହୃଦୟରେ ଜାଗେ କୋଟିଏ ଯୁଗର
ସ୍ୱାଗତୋକ୍ତି ଅନୁରାଗ ll

ଅତିକ୍ରମି ଯେବେ ପାହାଚ ପାହାଚ
ମୁକ୍ତି ମଣ୍ଡପକୁ ଛୁଏଁ
ହୃଦୟ ବେଳାରେ ଶିହରଣ ଖେଳି
ରତ୍ନ ମଣ୍ଡପକୁ ଧାଏଁ ll

ଭିଡ଼ ଠେଲିଠେଲି ଲମ୍ବା ଧାଡ଼ି ପରେ
ଶ୍ୱାସ ମୋ ବହଇ ଖରେ
ଲାଗଇ ଯେମିତି ପ୍ରାଣପକ୍ଷୀ ମୋର
ଉଡ଼ିଯିବ ଏହି ଠାରେ ll

ଗରୁଡ଼ ଖୁମ୍ବର ପାଶେ ଛିଡ଼ାହୋଇ
ଦଣ୍ଡେ କରି ଆଲିଙ୍ଗନ
ଚାହିଁଛି ଅଧୀରେ ଗର୍ଭଗୃହ ଠାରେ
ପାଇବିକି ଦରଶନ ll

ହାତ ଟେକି ଦେଇ ଛାତିଏ କୋହରେ
ଅଦମ୍ୟ ପ୍ରଣତି ଢାଳି
ଦେଖିବି ତୁମର ଶ୍ୟାମଘନ ରୂପ
କଳାକାହ୍ନୁ ବନମାଳୀ ll

✍️ଗୀତାଞ୍ଜଳି ପୃଷ୍ଟି