ଭାଗିରଥି ସାଗର ସୁରକ୍ଷା ପାଇଁ ପାଞ୍ଚ ଦଫା ଦାବିପତ୍ର

ଢେଙ୍କାନାଳ ପୌରାଞ୍ଚଳର କେନ୍ଦ୍ର ବିନ୍ଦୁରେ ଥିବା ଭାଗିରଥି ସାଗରର ସୁରକ୍ଷା ସମ୍ପର୍କରେ ସୁରକ୍ଷା ସମିତିର ପାଞ୍ଚ ଦଫା ସମ୍ବଳିତ ଏକ ଦାବି ପତ୍ର ସଦର ତହସିଲଦାର ଏବଂ ପୌର ନିର୍ବାହୀ ଅଧିକାରୀଙ୍କୁ ପ୍ରଦାନ କରାଯାଇଥିବା ବେଳେ ଏହାର ନକଲ ଜିଲ୍ଲାପାଳ ଓ ଟାଉନ ଥାନା ଅଧିକାରୀଙ୍କୁ ମଧ୍ୟ ପ୍ରଦାନ କରାଯାଇଛି ।

ଚିନ୍ମୟ ମିଶନ ପାଖରେ ତିଆରି ହେଉଥିବା ଘରକୁ ସଦର ଆର ଆଇ ପୋଲିସ ସହାୟତାରେ ବନ୍ଦ କରାଇଥିଲେ । ତଥାପି ଘର ତିଆରି କରୁଥିବା ମାଲିକ ନିଜ ଜିଦି ରେ ଅଟଳ ଥିଲେ । ଭାଗିରଥି ସାଗରର ସଫେଇ ଓ ଉନ୍ନତିକରଣ ପାଇଁ ପ୍ରତ୍ୟେକ ବର୍ଷ ପ୍ରଚୁର ପରିମାଣର ଅର୍ଥ ଖର୍ଚ୍ଚ କରାଯାଉଛି । ମାତ୍ର ସଫେଇ ହେଉନାହିଁ କିମ୍ବା ଉନ୍ନତି ପରିଲକ୍ଷିତ ହେଉନାହିଁ ।

ଅର୍ଥ ତୋସାରପାତର ଏକ ନିଛକ ପ୍ରତିଛବି ପ୍ରତିପାଦିତ ହେଉଛି । ପୁଣି ପାଞ୍ଚ କୋଟି ଅର୍ଥ ବ୍ୟୟରେ ଏହାର ଉନ୍ନତିକରଣ ପାଇଁ ରାଜ୍ୟ ସରକାର ଆଦେଶ ଦେଇଛନ୍ତି । ସୁରକ୍ଷା ସମିତି ପକ୍ଷରୁ ୩ ଥର ପତ୍ର ମାଧ୍ୟମରେ ସ୍ଥାନୀୟ ଲୋକଙ୍କୁ ଏଥିରେ ଆଲୋଚନା କରିବାପାଇଁ ଜଣାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି କାର୍ଯ୍ୟବାହି ହୋଇନାହିଁ ।

ବିଭିନ୍ନ ଗଣ ମାଧ୍ୟମ ଉଜାଗର କରୁଥିଲେ ମଧ୍ୟ ପ୍ରଶାସନ ନିରବ ଦ୍ରଷ୍ଟା l ପ୍ରତିବଦଳରେ ପୁଷ୍କରିଣୀର ଖାଲି ପଡ଼ିଥିବା ଜାଗା ଉପରେ ଅନୈତିକ କନଷ୍ଟ୍ରକ୍ସନ ବଢିଚାଲିଛି । ଭାଗିରଥି ସାଗର ସୁରକ୍ଷା ସମିତି ପକ୍ଷରୁ ପାଞ୍ଚ ଦଫା ସମ୍ବଳିତ ଦାବି ପତ୍ରରେ ଚାଲିଥିବା କନଷ୍ତ୍ରକ୍ସନକୁ ବନ୍ଦ କରିବା, ରେକର୍ଡ ଅନୁସାରେ ପୁଷ୍କରିଣୀର ଏରିଆ ନିର୍ଧାରଣ କରି ସିମେଣ୍ଟ ଖୁଣ୍ଟି ପୋତlଯିବା, ପୁଷ୍କରିଣୀଟିକୁ ପୋତିବା ପାଇଁ ଭିତରେ ପାଖରେ ପକାଯାଉଥିବା ମାଟି ଓ ଇଟା ଖଣ୍ଡକୁ ବାହାର କରିବା, ହୁଡ଼ା ଉପରେ ଚୋରା ବାଲି ଓ ଗୋଡ଼ି ଡ଼ମ୍ପିଙ୍ଗ ବନ୍ଦ କରିବା ଓ ପୁଷ୍କରିଣୀ ଚତୁର୍ପାଶ୍ୱ ସଫା ରଖିବା ପ୍ରମୁଖ ଥିଲା ।

ଏହି କାର୍ଯ୍ୟକ୍ରମର ଆଲୋଚନାରେ ସୁରକ୍ଷା ସମିତିର ସଭାପତି ପଙ୍କଜ ନାୟକ, ଉପସଭାପତି ଜି. ମନ୍ମଥ ରାଓ, ସମ୍ପାଦକ ଅଶୋକ କୁମାର ସ୍ୱାଇଁ, ସହସମ୍ପାଦକ ଦୟାନିଧି ବେହେରା, ଉଦୟନାଥ ବେହେରା ପ୍ରମୁଖ ଭାଗ ନେଇଥିଲେ ।