ଏତିକି ମୋ ନିବେଦନ

ତୁମେ ନିରାକାର ଦରଦୀ ଠାକୁର
            ଭକତ ଜୀବନ ଧନ
ଚତୁର୍ଦ୍ଧା ମୂରତି ଦରଶନ ପାଇଁ
             ବ୍ୟାକୁଳ ହୁଏ ମୋ ମନ !
କୋଟି ଓଡିଆଙ୍କ ପ୍ରାଣର ଦେବତା
             ତୁମେ ତ ନୀଳ ଶଇଳ
ସପନରେ ମୋର ତୁମକୁ ଦେଖିକି
              ଆଖି ଲୁହ ଛଳଛଳ |

ଆଖି ଆଢ଼ୁଆଳେ ସଭିଙ୍କୁ ରଖିଛ
               ଆହେ ପ୍ରଭୁ ଜଗନ୍ନାଥ
ଏତିକି ମାଗୁଣି ମୋ ମଥା ଉପରେ
              ରଖିବ ଅଦେଖା ହାତ |
ଭାବୁଛି କହିବି ମନ କଥା ମୋର
              କହିବାକୁ ଲାଗେ ଡ଼ର
ଦୁଃଖ କଥା ଶୁଣି ତୁମେ ଯଦି ପ୍ରଭୁ
               କରିଦେବ ସାତ ପର |

ତୁମ ଡ଼ୋରି ଟିକେ ଲଗାଇ ଦିଅ ହେ
                ତୁମ ଦରଶନେ ଯିବି
ବଡ଼ ଦେଉଳରେ ତୁମ ସେବା କରି
                 ଅବଢ଼ା ଅନ୍ନ ଭୁଞ୍ଜିବି |
କିଏ କହେ ତୁମେ ମନୁଆଁ ହଟିଆ
                 କାଳିଆ ଜଗତ ନାଥ
ଭକତ ଚାହାନ୍ତି ଦେଖିବାକୁ ବଡ଼
                 ଦାଣ୍ଡେ ନନ୍ଦିଘୋଷ ରଥ |

ଆଖି ଆଢ଼ୁଆଳେ ସଭିଙ୍କୁ ରଖିଥା
                 ତୁମ ପାଶେ ଥାଉ ଭାବ
ଓଡ଼ିଆ ଜାତିଟା ତୁମ ପାଇଁ ପ୍ରଭୁ
                 ମନେ କରୁଥାଏ ଗର୍ବ |
ଯେତେ ଦୁଃଖ ଦେବ ସବୁ ସହିଯିବି
                 କରିବିନି ଅଭିମାନ
ଝୁଣ୍ଟି ଗଲେ କେବେ ଧରିନେବ ହାତ
                  ଏତିକି ମୋ ନିବେଦନ |

✍️ ବିକାଶ କୁମାର ହୋତା