ଚିଠି ଲେଖିବାକୁ ମନ ମୋ ହେଉଛି
ମୋର ଦିନବନ୍ଧୁ ପାଖେ,
ମୋ ଭାବ ରଙ୍ଗ ମଞ୍ଚେ ନାୟକ ତୁମେ
ଭାବ ନିଅଣ୍ଟ ମୋ ବକ୍ଷେ ।
କେମିତି ପୂଜିବି ତୁମକୁ ହେ ବନ୍ଧୁ
ଗୋପନେ ଦିଅ ବତାଇ,
ଚିଠି ପାଇ ଚିଠି ଦେବ କୃପାସିନ୍ଧୁ
ବିଳମ୍ୱ କରିବ ନାହିଁ ।
ଭାବକୁ ନିକଟ ଅଭାବ କୁ ଦୂର
ଅଭାବି ମଣିଷ ମୁହିଁ,
ପୂଜା ବିଧି ତୁମ ଜଣା ନାହିଁ ମୋତେ
ଚିଠିରେ ଦିଅ ବତାଇ ।
ତୁମେହିଁ ଅନନ୍ତ ତୁମେ ନୀଳକଣ୍ଠ
ତୁମ ବିନା ମୁକ୍ତି ନାହିଁ,
ସୁଖ ଦୁଃଖ ସବୁ ତୁମ କୃପା ବଳେ
ହତୋତ୍ସାହ ହେବି କାହିଁ ।
କେବେ ଯଦି ଦେଖା ଦିଅନ୍ତ ଛାମୁ ହେ
ଦେଖିବି ନୟନ ଭରି,
ଭବ ସଂସାରକୁ ଆରୋଗ୍ୟ ପାଇଁକି
କରିବି ଟିକେ ଗୁହାରି ।
ଭବ ରଙ୍ଗ ମଞ୍ଚେ ଏମିତି ନାୟକ
ସଂସାର ତୁମରି ହାତେ,
ରଙ୍ଗ ଭରି ଦିଅ ମୋ ଜୀବନେ କିଛି
ଦୁନିଆଁ ଝୁରିବ ମୋତେ ।
ଚିଠି କୁ ମୋହର ଅଣଦେଖା କରି
ଫୋପାଡି ଦେବନି ଦୂରୁ,
ଚିଠି ପାଇ ଚିଠି ଦେବ ବୋଲି ଆଶା
ମୋ ଜୀବନ ପଛେ ସରୁ ।
✍🏻 ସୁବ୍ରତ ସେଠୀ