ମନ ଉପବନେ ମୋ ପ୍ରୀତି ଅଙ୍ଗନେ
ଶେଷ ଶୃଙ୍ଗାରର ଚିହ୍ନ
ଶ୍ରବଣରେ ବାଜେ ଭକ୍ତି ରସାଣିତ
ସୁମଧୁର ବଂଶୀ ସ୍ଵନ ll
ତୁମ ପାଇଁ ପ୍ରଭୁ ସଜେଇ ରଖିଛି
ମୋ ହୃଦୟ ସିଂହାସନ
ଧୀର ପାଦପାତେ ସୁପ୍ତ ବା ଜାଗ୍ରତେ
ଆସ ପ୍ରଭୁ ନାରାୟଣ ll
ମଳିନ ପଡିନି ଶେଷ ଶୃଙ୍ଗାର ମୋ
ତୁମ ପଥ ଅଛି ଚାହିଁ
ରାଧାରାଣୀ ନୁହେଁ ମୀରା ବି ମୁଁ ନୁହେଁ
ମାୟା ଜଗତର ଛାଇ ll
ତପନ ଲୁଚିଲେ ବାଦଲ ଉହାଡ଼େ
ଅଦୃଶ୍ୟ ହୋଇବ ଛାୟା
ତଥାପି ଏ ମନ ଦ୍ରୁତ ଗତିଶୀଳ
ମରୀଚିକା ପଛେ ବାୟା ll
ବାନ୍ଧିଦିଅ ପ୍ରଭୁ ଶ୍ରଦ୍ଧା ଶିକୁଳିରେ
ତୁମ ପ୍ରେମ ବନ୍ଦୀଶାଳେ
ଧନ୍ୟ ହେଉ ଛାର ଏ ନର ପରାଣ
ଭିଜୁଥାଉ ଭକ୍ତି ଜଳେ ll
ସେଇ ମିଳନରେ ଶୃଙ୍ଗାର ମୋହର
ହଜିଯାଉ ଚିର ଦିନ
ଅଲଭ୍ୟ ପ୍ରାପ୍ତିରେ ଉତଫୁଲ୍ଲିତ ହେଉ
ଏଇ ମନ ବୃନ୍ଦାବନ ll
✍️ଗୀତାଞ୍ଜଳି ପୃଷ୍ଟି