ଢେଙ୍କାନାଳ ସଚେତନ ନାଗରିକ ଫୋରମ୍ ପକ୍ଷରୁ କୁନି କୁନି ପିଲାମାନଙ୍କୁ ଇଂରାଜୀ କିଟ୍ ବଣ୍ଟନ

ଢେଙ୍କାନାଳ ସଚେତନ ନାଗରିକ ଫୋରମ୍ ପକ୍ଷରୁ ଗନ୍ଦିଆ ବ୍ଲକର ପିଙ୍ଗୁଆ ଗ୍ରାମପଞ୍ଚାୟତରେ କୁନି କୁନି ପିଲାଙ୍କୁ ଇଂରାଜୀ କିଟ୍ ବଣ୍ଟନ ହୋଇଯାଇଅଛି । ସଭାପତିତ୍ବ ଭାଷଣରେ ଶିକ୍ଷାବିତ୍ ଗୋପାଳ ଚନ୍ଦ୍ର ମହାଳିକ କିପରି ସମାଜ ଗଠନରେ ଶିକ୍ଷାର ମହତ୍ତ୍ଵ ସର୍ବୋଚ୍ଚ ସ୍ଥାନ ଅଧିକାର କରିଅଛି, ଏହି ତତ୍ୱକୁ ବିସ୍ତାର ଭାବେ ବର୍ଣ୍ଣନା କଲେ ।

ମୁଖ୍ୟ ଅତିଥି ଭରତ କୁମାର ଦାସ ଫୋରମ୍ ପକ୍ଷରୁ ହେଉଥିବା ବିଭିନ୍ନ ସେବା କାର୍ଯ୍ୟର ବର୍ଣ୍ଣନା ସହ ଚଳିତ ବର୍ଷକୁ ଶିକ୍ଷା ବର୍ଷ ରୂପେ ପାଳନ ଅବସରରେ ଏହି କାର୍ଯ୍ୟକ୍ରମକୁ ହାତକୁ ନିଆଯାଇଥିବାର କହିଥିଲେ । ଅନ୍ୟତମ ଅତିଥି ଅକ୍ରୁର ବେହେରା ଛୋଟ ପିଲାଙ୍କୁ ଭଲ ମଣିଷ ରୂପେ ଗଢି ତୋଳିବାରେ ଏହି କିଟ୍ ସାହାଯ୍ୟ କରିବା କଥା କହିଥିଲେ । ପିଙ୍ଗୁଆ ଜୋନ୍ ସଭାପତି ସରୋଜ କୁମାର ମହାଳିକ ତାଙ୍କ ଜୋନ୍ ର ସମସ୍ତ ଜି.ପି. ରେ ଏହି କାର୍ଯ୍ୟ କରିବା ପାଇଁ ସଂକଳ୍ପ ନେଇଥିଲେ ।

ଯୁବ ମହିଳା ନେତ୍ରୀ ତଥା ପିଙ୍ଗୁଆ ଜି.ପି. ର ସଭାନେତ୍ରୀ ସ୍ନେହଲତା ସାହୁ ପଞ୍ଚାୟତର ସମସ୍ତ କୁନି କୁନି ପିଲାଙ୍କୁ ଏହି କିଟ୍ ଦେବାର ବ୍ୟବସ୍ଥା ବାବଦରେ କହିବା ସଙ୍ଗେ ସଙ୍ଗେ ଫୋରମ୍ ର କାମକୁ ଆଗକୁ ନେବା ପାଇଁ ସମସ୍ତେ ସହଯୋଗ କରିବା କଥା କହିଥିଲେ । ଅନ୍ୟ ମାନଙ୍କ ମଧ୍ୟରେ ସୁଧୀର କୁମାର ସାହୁ, ଦୀପକ ସ୍ୱାଇଁ, କୃପା ମହାଳିକ, ସୌମ୍ୟରଞ୍ଜନ ସାହୁ ଆଦି କାର୍ଯ୍ୟକ୍ରମରେ ସହଯୋଗ କରିଥିଲେ ।