ବାପାଙ୍କର କଥା
ତୀର ପରି ଛାତିକୁ କରତେ
କେବେ ଲାଗେ ମହୁ ଠାରୁ ମିଠା l
ବାପାଙ୍କର ଆଖି
ଢଳ ଢଳ କମଳର ତୁଲ
ଘୁରି ବୁଲେ ଆମ ପାଖା ପାଖି l
ବାପାଙ୍କର ନାକ
ଅବିକଳ ଖଣ୍ଡାଧାର ତୀଖ
ନାଲି ପଡେ ଅଇଲେ ଆତଙ୍କ l
ବାପାଙ୍କର ଚାଲି
ଖଣ୍ଡେ ଦୂରୁ ପାହୁଣ୍ଡ ଶବ୍ଦରୁ
ଜଣାଯାଏ ଆସୁଛନ୍ତି ବୋଲି l
ବାପାଙ୍କର ହସ
ଢେଉ ତୋଳେ ପବନ ବୁକୁରେ
କମ୍ପିଯାଏ ସାରା ପରିବେଶ l
ବାପାଙ୍କର ଚୁଟି
କଳା କଜଳ କୁଞ୍ଚି କୁଞ୍ଚିକା
ଚିରିଣି ଯେ ହୁଏ ଛାଟି ପିଟି l
ବାପାଙ୍କର ହାତ
ବଳିଷ୍ଠ କରଣି କରତଳ
ବେଢ଼ି ଥାଏ ଆମ ସରହଦ l
ବାପାଙ୍କର ପାଦ
ଲଙ୍ଘି ଯାଏ ବନ ମରୁ ମେରୁ
ଆମ ତୁଣ୍ଡେ ଦେବା ପାଇଁ ଖାଦ୍ୟ l
ବାପାଙ୍କ ଚେହେରା
କନ୍ଦର୍ପଠୁ ବଳି ଲାଗେ ମତେ
ସୌନ୍ଦର୍ଯ୍ୟର ଚଳନ୍ତି ପସରା l
ବାପାଙ୍କ ହୃଦୟ
ପରିବ୍ୟାପ୍ତ ମାଟିରୁ ଆକାଶ
ମାପିବାକୁ ନାହିଁ ମୋ ସାମର୍ଥ୍ୟ l
ବାପାଙ୍କ ଆଦର୍ଶ
ପରହିତେ ପ୍ରାଣ ସମର୍ପଣ
ଆମ ପାଇଁ ଆଣିଛି ଉତ୍କର୍ଷ l
ବାପାଙ୍କ ବ୍ୟକ୍ତିତ୍ୱ
ସରଳ, ଉଦାର, ଅକପଟ
ସାନିଧ୍ୟେ ଯା ଜନେ କୃତ୍ୟ କୃତ୍ୟ l
ବାପାଙ୍କ ସିନିହ
ଅବାରିତ ଅସୀମ ଅବ୍ୟକ୍ତ
ସଞ୍ଚରିଛି ଦେହରୁ ବିଦେହ l
ବାପାଙ୍କର ଆଶା
ମୋ ପିଲାଟି ମତେ ଟପି ଯାଉ
ସଂସାରକୁ ଦେଖାଉ ସେ ଦିଶା l
✍️ ସୈାମ୍ୟେନ୍ଦ୍ର ମିଶ୍ର