ସାବିତ୍ରୀ ବ୍ରତ

ଯତି ସତୀ  ଦେଶ   ଏ ଭାରତ ବର୍ଷ
            ଧନ୍ୟ କରିଲ ସାବିତ୍ରୀ
  ତବ ନାରୀ ଧର୍ମ  ବଶ ହେଲେ ଧର୍ମ
         ଲଭିଲ  ଅକ୍ଷୟ  କୀର୍ତ୍ତି ।

ପତି ପିତୃ କୁଳ    କରିଲ ଉଜ୍ଜ୍ୱଳ
      ତୁମରି ସାଧନା ବଳେ
ସତୀ ପତିବ୍ରତା  ତୁମ ମହାନତା
        ତୁମେ ବନ୍ଦିତା ଭୂତଳେ ।

ତ୍ୟାଗ ସମର୍ପଣ   ଶ୍ରେଷ୍ଠ ଆଚରଣ
      ଅଶେଷ ଧୈର୍ଯ୍ୟ ଧାରିଣୀ
ତୁମେ ଦଶ ଭୁଜା  ତୁମେ ଦେବୀ ଦୁର୍ଗା
        ତୁମେ ସଙ୍କଟ ତାରିଣୀ ।

    ଏ ସାବିତ୍ରୀ ବ୍ରତ  ଯଜ୍ଞ ଅବା ମନ୍ତ୍ର
         ହୋଇବ ସିନା ପୂରଣ
      ତୁମରି ଆଦର୍ଶ   ହେଲେ ଚଲାପଥ
           ମୃତ୍ୟୁ ଲଭିବ ମରଣ  ।।

ମନ୍ତ୍ରରୁ ଶକତି  ହୁଅଇ ଉତ୍ପତ୍ତି
      ବିଚାର ତହିଁରୁ ଘେନି
ଖାଲି ଉଚ୍ଚାରଣ  ବାହ୍ୟ ଆବରଣ
       ନୁହେଁ ମଙ୍ଗଳ ଦାୟିନୀ ।

ବୃଥା ଆଡମ୍ବର  ଦୂରେ ହେଉ ଦୂର
      ଅନ୍ତର ର  ସତ୍ୟ ସଙ୍ଗେ
ସାବିତ୍ରୀ ଚେତନା  ଜୀବନ ସାଧନା
      ହୃଦେ ଭରୁ ପ୍ରେମ ରାଗେ।

ପୂର୍ଣ୍ଣ ହେଉ ବ୍ରତ  ପୁରୁ ମନୋରଥ
       ମୃତ୍ୟୁ ଭୟ ହେଉ ଦୂର
   ଶୁଭ ଅବସରେ  ତୁମ ଚରଣରେ
        କୋଟି କୋଟି ନମସ୍କାର ।

           
✍️ବସନ୍ତ କୁମାର ବରାଳ