ନିର୍ବାଚନ ପରର ହିଂସା ; ଧାରୁଆ ଅସ୍ତ୍ରରେ ମୁଣ୍ଡକୁ ହାଣିଲେ !

ଢେଙ୍କାନାଳ ଜିଲ୍ଲା କାମାକ୍ଷାନଗର ରେ ନିର୍ବାଚନ ପରର ହିଂସା ଦେଖିବାକୁ ମିଳିଛି। କାମାକ୍ଷାନଗର ବ୍ଲକ ବାଉଁଷପାଳ ପଞ୍ଚାୟତର ୪ ନଂ ଓ୍ବାର୍ଡରେ ଘଟିଛି ଘଟଣା । ସୂଚନା ମୁତାବକ ଗତ କାଲି ବୁଧବାର ରାତି ପ୍ରାୟ ୧୧ ଟା ବେଳକୁ ୪ ନଂ ଓ୍ବାର୍ଡର ପବିତ୍ର ବିଶ୍ବାଳ ଘରକୁ ଫେରୁଥିବାବେଳେ, ଧାରୁଆ ଅସ୍ତ୍ରରେ ତାଙ୍କ ମୁଣ୍ଡକୁ ହାଣି ଦେଇଛନ୍ତି।

ଗ୍ରାମର ପିନୁ,ସାନୁ ଓ ସୋନୁ ତାଙ୍କୁ ହାଣିଥିବା ଅଭିଯୋଗ କରିଛନ୍ତି ପବିତ୍ର। ଗତ ତ୍ରୀସ୍ତରିୟ ପଞ୍ଚାୟତ ନିର୍ବାଚନରେ ବାଉଁଷପାଳ ପଞ୍ଚାୟତରେ ପବିତ୍ର ଜିତିଥିବା ସରପଞ୍ଚ ଓ ସମିତିସଭ୍ୟ ଦଳର ଜଣେ ଦୃଢ ସମର୍ଥକ ଥିଲେ। ତେଣୁ ହାରିଥିବା ଦଳର ଲୋକମାନେ ପବିତ୍ରଙ୍କ ଯୋଗୁ ତାଙ୍କ ଦଳ ହାରିଥିବା ଭାବିଥିଲେ।

ଦିନ ବେଳା ପବିତ୍ର ଘରେ ନଥିବା ବେଳେ ମଦ ପିଇ ପିନୁ ଓ ସାନୁ ଆସି ଘର ଆଗରେ ଅସଭ୍ୟ ଭାସାରେ ଗାଳିଗୁଲଜ କରିଥିଲେ। ଏବଂ ରାତିରେ ସେ କାମାକ୍ଷାନଗରରୁ କାମସାରି ନିଜ ଘରକୁ ଫେରୁଥିବା ବେଳେ ବାଟରେ ଯଗି ରହି ତାଙ୍କୁ ଏକ ଧାରୁଆ ଅସ୍ତ୍ରରେ ପିନୁ ଓ ସାନୁ ଆକ୍ରମଣ କରିଥିଲେ। ପରିବାର ଲୋକେ ତାଙ୍କୁ ଗୁରୁତର ଅବସ୍ଥାରେ କାମାକ୍ଷାନଗର ମେଡିକାଲରେ ଭର୍ତ୍ତି କରିଥିଲେ। ତାଙ୍କ ମୁଣ୍ଡରେ ଗଭିର ଆଘାତ ଲାଗିଛି। ଏ ସଂକ୍ରାନ୍ତରେ କାମାକ୍ଷାନଗର ଥାନାରେ ଅଭିଯୋଗ ପରେ ପୋଲିସ ପହଞ୍ଚି ତଦନ୍ତ ଚଳାଇଛି। କିନ୍ତୁ ଏ ନେଇ ପୋଲିସର କୌଣସି ପ୍ରତିକ୍ରିୟା ମିଳିପାରିନାହିଁ।