ଅନନ୍ତ କାଳରୁ ଚାହିଁ ମୁଁ ରହିଛି
ତୁମ ଆସିବାର ପଥ
ନିର୍ନିମେଷ ଚକ୍ଷୁ ପଲକ ପଡୁନି
ପ୍ରତୀକ୍ଷାର ନାହିଁ ଅନ୍ତ……||
ଆସିବାକୁ ଥିବା ତୁମ ପ୍ରତିଶ୍ରୁତି
ପ୍ରତାରଣା ଭଳି ଲାଗେ
ହେଲେବି ମୋ ମନ ଅବୁଝା ହୁଏନା
ଶାଶ୍ୱତ ଏ ଅନୁରାଗେ….||
ତୁମେ ତ କହୁଛ ତୁମେ ସର୍ବ ବ୍ୟାପୀ
ସବୁ ତୁମ ପ୍ରତିଛବି
କେମିତି କହିବି ପାରୁନି ମୁଁ ତୁମ
ଦରଶନ ଟିକେ ଲଭି……||
ତୁମେ ଦେଖାଇଛ ସଖା ଅର୍ଜୁନଙ୍କୁ
ନିରାକାର ବିଶ୍ୱ ରୂପ
ତଥାପି କାହିଁ ମୁଁ ଆଙ୍କି ପାରୁନାହିଁ
ଅରୂପରେ ତୁମ ରୂପ……||
ଏ ଦେହ ଦେଉଳେ ତୁମେ ଅଛ ବୋଲି
‘ଗୀତା ‘ ରେ ପଢ଼ିଛି ଯେବେ
ତଥାପି କେବେମୁଁ ଲଭିନି ପରଶ
ଚେତନାର ଅନୁଭବେ……||
ଏତିକି ଗୁହାରି କରୁଛି ଶ୍ରୀହରି
ବିଚାର କରିବ ମୋରେ
ତଵ ଶ୍ରୀଅଙ୍ଗ ରେ ତୁଳସୀ ପରାଏ
ଲାଗୁଥିବି ନିରନ୍ତରେ…..
✍️ଗୀତାଞ୍ଜଳି ପୃଷ୍ଟି