ଅସୁରକ୍ଷିତ ଅଳସୁଆ ହାଟ ମୁଖ୍ୟ ପ୍ରବେଶ ପଥ, ସଫା ହେଉନି ପଦଯାତ୍ରୀଙ୍କ ପାଇଁ ଉଦ୍ଦିଷ୍ଟ ରାସ୍ତା

ଅଳସୁଆ ହାଟ ଢେଙ୍କାନାଳ ସହରର ଏକ ମୁଖ୍ୟ ବ୍ୟବସାୟ କେନ୍ଦ୍ର l ପୌରାଞ୍ଚଳର ଜନ ବସତି ସହିତ ସହରର ଚତୁର୍ପାଶ୍ୱରୁ ଚାଷୀ ଓ ବ୍ୟବସାୟୀ ମାନେ ନିଜ ନିଜର ଫସଲ ଏବଂ ଅନ୍ୟ ଜିନିଷପତ୍ର କିଣା ବିକା କରିଥାନ୍ତି l ଗତ ଦୁଇ ବର୍ଷ ହେଲା ପୌର ପ୍ରଶାସନ ପକ୍ଷରୁ ଲୋକମାନଙ୍କ ପାଇଁ ସ୍ଥାୟୀ ପିଣ୍ଡି ଏବଂ ରାସ୍ତା ଘାଟ ତିଆରି କରିଥିଲା l ଏପରିକି ହାଟ ଭିତରକୁ ପ୍ରବେଶ କରିବାପାଇଁ ସୁରକ୍ଷା ଦୃଷ୍ଟିରୁ ଗୋଟିଏ ପଥ ରଖାଯାଇଛି l ପ୍ରବେଶ ପଥ ରାସ୍ତା ଟି ବର୍ଷେ ନପୂରୁଣୁ ନିମ୍ନ ମାନର କାମ ଯୋଗୁଁ ଭାଙ୍ଗି ଗଲାଣି l ଅନେକ ଚାଷୀ, ବ୍ୟବସାୟୀ ଲୁନା ଗାଡ଼ିରେ ଜିନିଷ ପତ୍ର ନେବାଆଣିବା ବେଳେ ଦୁର୍ଘଟଣାର ଶିକାର ହେଉଛନ୍ତି l ଗାଈଗୋରୁ, ଷଣ୍ଢ ପାରିବା ବିକାଳୀଙ୍କ ଉପରେ ଦାଉ ସାଜୁଛନ୍ତି l

ବେଳେ ବେଳେ ସେମାନଙ୍କ ମାଡ଼ଗୋଳ ଯୋଗୁଁ ବ୍ୟବସାୟୀ ମାନେ ଇତସ୍ତତଃ ଦୌଡ଼ିବାକୁ ପଡ଼ୁଛି l ଗାଈଗୋରୁ, ଷଣ୍ଢ ଓ ବଡ଼ ଭାରି ଯାନ ପ୍ରବେଶ ନକରିବା ପାଇଁ କୌଣସି ବ୍ୟବସ୍ଥା କରାଯାଇ ନାହିଁ l ହାଟ ପାଚେରୀ କଡ଼ରେ ଥିବା ପଥଚାରୀ ପେଭର ବ୍ଲକ ତିଆରି ରାସ୍ତାଟି ସଫା କରାଯାଉନାହିଁ l ଜଣେ ସ୍ଥାନୀୟ ବ୍ୟବସୟୀ ସତ୍ୟନାରାୟଣ ସାହୁ କୁହନ୍ତି ଯେ “ଅନେକ ଲୋକ ପଡିଯାଇ ଖଣ୍ଡିଆ ଖବରା ହେଲେଣି l ମୁଁ ହାଟ ଭିତର ରାସ୍ତାରେ ପ୍ରଥମେ ପାରିବା ନେଇ ବସୁଛି, ସବୁ ପ୍ରକାର ମାଡ଼ ମୋ ଉପରେ ହେଉଛି” l ସବୁ ଘଟଣା ମୁନିସିପାଲିଟିକୁ ଜଣାଉଛୁ l ସେମାନେ ଟାଳଟୁଳ ନୀତିରେ କୁହନ୍ତି ଏମାସରେ ହେବ, ଆର ମାସରେ ହେବ l କିନ୍ତୁ ଏପର୍ଯ୍ୟନ୍ତ ରାସ୍ତା ସଫା ହେଉନି କି ଭିତର ସଫା ହେଉନି ଏବଂ ରାସ୍ତା ବି ମରାମତି ହେଉନାହିଁ l ଏହାର ତୁରନ୍ତ ସଫାଇ ଏବଂ ରାସ୍ତା ମରାମତି ପାଇଁ ବ୍ୟବସାୟୀ ଓ ଖାଉଟି ମାନେ ଦାବି କରିଛନ୍ତି l