ମୌସୁମୀ ପୂର୍ବରୁ ଭାଗୀରଥୀ ସାଗର ଭିତରୁ ପଙ୍କ ମାଟି ନିଷ୍କାସନ କରିବା ଦାବି

ମୌସୁମୀ ପୂର୍ବରୁ ଭାଗୀରଥୀ ସାଗର ଭିତରୁ ପଙ୍କ ମାଟି ବାହାରକୁ ନିଷ୍କାସନ କରିବା ଦାବିରେ ପୋଖରୀ ସୁରକ୍ଷା ସମିତିର କାର୍ଯ୍ୟକର୍ତ୍ତା ମାନେ ଅତିରିକ୍ତ ଜିଲ୍ଲାପାଳ ଶ୍ରୀ ରମେଶ ଚନ୍ଦ୍ର ସେଠୀଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି l ୨୦୨୪ ରେ ଢେଙ୍କାନାଳ ପୌରାଞ୍ଚଳର ଭାଗୀରଥୀ ସାଗର, କୁଞ୍ଜକାନ୍ତ ପୋଖରୀ, ହୀରାସାଗର ପୋଖରୀ ସମେତ ପୌରାଞ୍ଚଳର ୧୬ ଟି ପୋଖରୀର ପଙ୍କ, ମାଟି ନିଷ୍କାସନ କରିବା କାର୍ଯ୍ୟ ଚାଲିଥିଲା । ମାତ୍ର ଠିକାଦାର ମାନେ ସଠିକ ଭାବେ ଉକ୍ତ ପଙ୍କ ମାଟି ନ ଉଠାଇବାରୁ ଜନ ଅସନ୍ତୋଷ ଉପୁଜିଥିଲା । ପରିସ୍ଥିତି ଏପରି ହେଲା ଯେ ପୋଖରୀ ସୁରକ୍ଷା ସମିତି ପକ୍ଷରୁ ତା ୧୨-୭-୨୦୨୪ ରେ ଢେଙ୍କାନାଳ ସହର ବନ୍ଦ ଡାକରା ପ୍ରସ୍ତାବ ଦିଆଯାଇଥିଲା ।

ଏହାକୁ ଦୃଷ୍ଟିରେ ରଖି ଜିଲ୍ଲାପାଳ ମହୋଦୟ ତା୧୦-୦୭-୨୦୨୪ ରେ ଉକ୍ତ ବନ୍ଦ ଡାକରାକୁ ସ୍ଥଗିତ କରିବାପାଇଁ ପୋଖରୀ ସୁରକ୍ଷା ସମିତି ନେତୃମଣ୍ଡଳୀ ସହିତ ଆଲୋଚନା କରିଥିଲେ । ଜିଲ୍ଲା ପ୍ରଶାସନର ଅଲୋଚନାକୁ ସମ୍ମାନ ଜଣାଇ ବନ୍ଦ ଡାକରା ସ୍ଥଗିତ କରାଯାଇଥିଲା ଏବଂ ଆସନ୍ତା ୧୫ ଦିନ ଭିତରେ ଭାଗୀରଥୀ ସାଗରର ପଙ୍କ, ମାଟି ସମ୍ପୂର୍ଣ୍ଣ ଉଠାଇବା ପାଇଁ ପୌରଯନ୍ତ୍ରୀ ଏବଂ ପୌରନିର୍ବାହୀ ଅଧିକାରୀ ଅତିରିକ୍ତ ଜିଲ୍ଲାପାଳଙ୍କ ମାଧ୍ୟମରେ ଲିଖିତ ପ୍ରତିଶୃତି ଦେଇଥିଲେ ଯେ ଫେବୃଆରୀ ୨୦୨୫ ପ୍ରଥମରୁ ସମସ୍ତ କାର୍ଯ୍ୟ ଆରମ୍ଭ ହେବ l ବର୍ତ୍ତମାନ ଫେବୃଆରୀ ମାସ ଶେଷ ହେବାକୁ ଯାଉଛି ମାତ୍ର ଏପର୍ଯ୍ୟନ୍ତ ପଙ୍କ ମାଟି ଉଠାଇବା କାର୍ଯ୍ୟ ଆରମ୍ଭ ହୋଇନାହିଁ l ଭାଗିରଥି ସାଗର ସୁରକ୍ଷା ସମିତିର ସଭାପତି ପଙ୍କଜ ନାୟକ, ସମ୍ପାଦକ ଅଶୋକ ସ୍ୱାଇଁ, ମନ୍ମଥ ରାଓ, ଉଦୟନାଥ ବେହେରା, ଦିଲ୍ଲୀପ ରାଉତ, ପ୍ରଫୁଲ୍ଲ ପଟ୍ଟନାୟକ ପ୍ରମୁଖ ଅତିରିକ୍ତ ଜିଲ୍ଲାପାଳଙ୍କୁ ଭେଟି ପୋଖରୀର ପଙ୍କ ମାଟି ଉଠାଇବା କାର୍ଯ୍ୟ ଆରମ୍ଭ କରି ମୌସୁମୀ ପୂର୍ବରୁ ସମ୍ପୂର୍ଣ୍ଣ କରିବାପାଇଁ ଅନୁରୋଧ କରିଥିଲେ l